ՀԱՅԱՍՏԱՆԻ ՇԱԽՄԱՏԱՅԻՆ ՖԵԴԵՐԱՑԻԱ

25. 11. 2017
07 : 49
26 Հոկտեմբեր 2017

Ամփոփվեցին Տիգրան Պետրոսյանի անվան շախմատի տան մինչև 8, 10 և 12 տարեկան պատանիների եզրափակիչ մրցաշարերի արդյունքները

Երեկ ամփոփվեցին Տիգրան Պետրոսյանի անվան շախմատի տան մինչև 8, 10 և 12 տարեկան պատանիների եզրափակիչ մրցաշարերի արդյունքները: Երեք մրցաշարերին մասնակցում էին 228 պատանի շախմատիստ: Մինչև 10 և 12 տարեկանների մրցաշարերում հաղթողի կոչման համար պայքարում էին 103-ական շախմատիստ, իսկ մինչև 8 տարեկանների մրցաշարում՝ 22:
Մինչև 8 տարեկանների մրցաշարում առաջին հորիզոնականը զբաղեցրեց Ալբերտո Աթոյանը, ով մրցաշարի ավարտից դեռևս մեկ տուր առաջ ապահովել էր առաջին հորիզոնականը: Արդյունքում Աթոյանը 9 հնարավորից վաստակեց 8.5 միավոր և միանգամից 1.5 միավորով առաջ անցավ 2-րդ հորիզոնականը զբաղեցրած Արման Սիմոնյանից, իսկ Վաչե Հովակիմյանը 7 միավորով եզրափակեց լավագույն եռյակը, վերջինս նաև միակն էր, ով կարողացել էր ոչ-ոքի խաղալ մրցաշարի հաղթողի հետ:
Մինչև 10 և 12 տարեկանների մրցաշարերն անցան ավելի լարված պայքարում. մինչև 10 տարեկանների առաջնության վերջին տուրում առաջատարները՝ Էդգար Հայրապետյանը և Դավիթ Ալեքսանյանը, մրցում էին միմյանց դեմ: Պարտիայում ուժեղ գտնվեց Հայրապետյանը և 8 միավորով գրավեց 1-ին հորիզոնականը: Դավիթ Ալեքսանյանը 7 միավորով դարձավ երկրորդը, իսկ նույնքան միավոր վաստակած Բենիկ Ագասարովը եզրափակեց լավագույն եռյակը:
Մինչև 12 տարեկանների մրցաշարի վերջին տուրից առաջ միանգամից 4 շախմատիստ պայքարում էին առաջին հորիզոնականի համար: Համառ պայքարի արդյունքում 8 միավորով հաղթող դարձավ Արմեն Գալաջյանը: Էրիկ Հակոբյանը հաղթողից հետ մնաց կես միավորով և դարձավ երկրորդը, իսկ Միքայել Ռոստոմյանը 7 միավորով հանգրվանեց 3-րդ հորիզոնականում:
Մինչև 10 և 12 տարեկանների մրցաշարերում սահմանված էին նաև հատուկ մրցանակներ լավագույն արդյունք ցուցաբերած աղջիկ մասնակիցների համար. մինչև 10 տարեկանների առաջնությունում մրցանակը բաժին հասավ Էլեն Միրզոյանին, իսկ մինչև 12 տարեկանների մրցաշարում լավագույնն էր Ալվարդ Ստեփանյանը:
Հաղթողներին և մրցանակակիրներին շնորհվեցին գավաթներ, պատվոգրեր և նվերներ: