ՀԱՅԱՍՏԱՆԻ ՇԱԽՄԱՏԱՅԻՆ ՖԵԴԵՐԱՑԻԱ

21. 02. 2018
19 : 16
14 Փետրվար 2018

Այսօր Սմբատ Լպուտյանի 60-ամյա հոբելյանն է

Այսօր ծննդյան 60-ամյա հոբելյանն է նշում Օլիմպիական չեմպիոն, Հայրենիքին մատուցած ծառայությունների համար երկրորդ աստիճանի մեդալի շքանշանակիր, Հայաստանի շախմատի ֆեդերացիայի նախագահի առաջին տեղակալ Սմբատ Լպուտյանը:

Հայաստանի շախմատի ֆեդերացիայի անձնակազմը միանում է բոլոր այն շնորհավորանքներին, որոնք աշխարհի բազմաթիվ անկյուններից այսօր ստանում է Սմբատ Լպուտյանը: Մաղթում ենք քաջառողջություն  և նորանոր ձեռքբերումներ, որոնք ուղղված կլինեն Հայաստանում շախմատի հանրահռչակմանը և զարգացմանը:

Սմբատ Լպուտյանը ծնվել է 1958 թվականի փետրվարի 14-ին Երևանում:
1975 թվականին ավարտել է Երևանի N 79 միջնակարգ դպրոցը:

Սմբատ Լպուտյանն արդեն 30 տարուց ավելի կրում է միջազգային գրոսմայստերի բարձրագույն կոչումը:

Շախմատային կարիերայի ընթացքում չորս անգամ նվաճել է Հայաստանի չեմպիոնի կոչումը (1978, 1980, 1998, 2001թթ.):

Երեք տարբեր թիմերի (ԲԿՄԱ , Բոսնիա, Երևան) կազմում չորս անգամ (1986, 1988, 1994, 1995 թթ. )դարձել է Եվրոպայի շախմատի ակումբային չեմպիոն:

Երկար տարիներ հանդիսացել է Հայաստանի շախմատի ազգային հավաքականի անդամ, որի կազմում հասել է բազմաթիվ նշանակալի նվաճումների՝

1992, 2002, 2004թթ. շախմատի Համաշխարհային  Օլիմպիադայի բրոնզե մեդալակիր,

1999թ. Եվրոպայի շախմատի թիմային առաջնության չեմպիոն,

1997, 2001, 2005թթ. Աշխարհի շախմատի թիմային առաջնության բրոնզե մրցանակակիր:

Հավաքականի կազմում ամենաբարձր նվաճումը գրանցել է 2006 թվականին՝ Թուրինի շախմատի Համաշխարհային Օլիմպիադայում նվաճելով ոսկե մեդալ:

Երկարատև շախմատային կարիերայի ընթացքում դարձել է բազմաթիվ շախմատային միջազգային մրցաշարերի հաղթող:

2002 թվականին հիմնադրել է Հայաստանի շախմատի ակադեմիան, որն այժմ ունի 50-ից ավել մասնաճյուղ ՀՀ բոլոր մարզերում:

2000-2012թթ. եղել է ՀԱՕԿ-ի գործադիր կոմիտեի անդամ:

2004-2012թթ. եղել է ՀԱՕԿ-ի «Արդարացի խաղ» հանձնաժողովի նախագահ:
2009 թվականին արժանացել է ՀՀ սպորտի վաստակավոր վարպետի կոչման:

2011թ. ընտրվել է «Այբ կրթական հանգույց» («ԱՅԲ» դպրոց) հիմնադրամի հոգաբարձուների խորհրդի անդամ:

2012թ. ընտրվել է Խ.Աբովյանի անվան ՀՊՄ համալսարանի «Շախմատի և սպորտի» ամբիոնի վարիչ:

2013թ.-ից Երևանի ավագանու անդամ է:

2015թ. փետրվարի 27-ին ՀՀ նախագահի կարգադրությամբ նշանակվել է ՀՀ Հանրային Խորհրդի անդամ:

2018 թվականից հանդիսանում է «Շախմատ» գիտահետազոտական ինստիտուտի հիմնադիր-տնօրենը։

Պարգևներ

1999թ. ՀՀ «Անանաիա Շիրակացի» մեդալ:

2006թ. ՀՀ «Մովսես Խորենացի» մեդալ:

2008թ. «Հայրենիքին մատուցած ծառայությունների համար երկրորդ աստիճանի մեդալ»: