ՀԱՅԱՍՏԱՆԻ ՇԱԽՄԱՏԱՅԻՆ ՖԵԴԵՐԱՑԻԱ

23. 09. 2017
20 : 30
05 Սեպտեմբեր 2017

Աշխարհի Գավաթ. Լևոն Արոնյանը նվաճեց երկրորդ շրջանի ուղեգիր, Մելքումյանն ու Հովհաննիսյանը ուղեգրի համար կպայքարեն թայ-բրեյքում

Թբիլիսիում տեղի ունեցան Աշխարհի Գավաթի խաղարկության 1-ին շրջանի երկրորդ պարտիաները: Լևոն Արոնյանը երկրորդ պարտիայում նույնպես հաղթանակ տոնեց Կոուդերի Դանիելի նկատմամբ և նվաճեց երկրորդ փուլի ուղեգիր:
Երկրորդ փուլի ուղեգրեր նվաճեցին նաև մրցաշարի մյուս գլխավոր ֆավորիտները. Մագնուս Կարլսենը, Վլադիմիր Կրամնիկը, Մաքսիմ Վաշիե-Լագրավը, Ուեսլի Սոն, Վիշվանաթան Անանդը: Առաջին շրջանի հիմնական անակնկալը Ալեքսանդր Լենդերմանի հաղթանակն էր Պավել Էլյանովի նկատմամբ: Հրանտ Մելքումյանը և Ռոբերտ Հովհաննիսյանը ոչ-ոքի խաղացին համապատասխանաբար Բորիս Գրաչովի և Մաքսիմ Ռոդշտեյնի հետ: Այս զույգերում հաղթողները կորոշվեն թայ-բրեյքում:

Աշխարհի Գավաթի պարտիաները մեկնարկում են Երևանի ժամանակով 15:00-ին:

Աշխարհի Գավաթի խաղարկությունն անցկացվում է սեպտեմբերի 2-28-ը:
Հանգստյան օրերն են սեպտեմբերի 18-ը և 22-ը:

Մրցաշարն անցկացվում  է նոկաուտ համակարգով՝ մրցախաղում պարտվողը դուրս է մնում հետագա պայքարից: Խաղարկությանը մասնակցում են 128 շախմատիստ:

Աշխարհի գրեթե բոլոր ուժեղագույն շախմատիստները՝  Մագնուս Կարլսենը, Լևոն Արոնյանը, Մաքսիմ Վաշիե-Լագրավը, Ուեսլի Սոն, Վլադիմիր Կրամնիկը, Հիկարու Նակամուրան, Շահրիյար Մամեդյարովը, Ալեքսանդր Գրիշչուկը, Վիշվանաթան Անանդը, Դին Լիժենը, Յու Յանյին, Սերգեյ Կարյակինը, Անիշ Գիրին, Վեյ  Յին, Լի Չաոն, Ռադոսլավ Վոյտաշեկը, Յան Նեպոմնյաշչին, Պյոտր Սվիդլերը,Պենտալա Հարիկրիշնան, Մայքլ Ադամսը, մասնակցում են մրցաշարին:

Ընդհանուր մրցանակային ֆոնդը կազմում 1.600.000 ԱՄՆ դոլար:

Բացի եզրափակչից (խաղարկվելու է 4 պարտիա), բոլոր փուլերի մրցախաղերը բաղկացած են 2 պարտիայից և անցնում են հետևյալ ժամակարգով՝ 90 րոպե առաջին 40 քայլի համար, այնուհետև 30 րոպե հավելում, առաջին քայլից սկսած յուրաքանչյուր քայլի համար 30 վայրկյան հավելումով: Մրցախաղում ոչ-ոքիի դեպքում խաղարկվում է թայ-բրեյք՝  2 պարտիա  25 րոպե + 10 վայրկյան յուրաքանչյուր քայլի համար ժամակարգով, կրկին ոչ-ոքիի դեպքում՝ 2 պարտիա 10 րոպե + 10 վայրկյան յուրաքանչյուր քայլի համար, կրկին հավասար արդյունքի դեպքում ևս 2 պարտիա՝ 5 րոպե + 3 վայրկյան յուրաքանչյուր քայլի համար: Այս մրցախաղում ոչ-ոքիի դեպքում խաղարկվում է որոշիչ պարտիա (արմագեդոն), որտեղ սպիտակներին տրվում է 5 րոպե, իսկ սևերին 4 րոպե՝ 61-րդ քայլից սկսած յուրաքանչյուր քայլի համար 3 վայրկյան հավելումով: Որոշիչ պարտիայում ոչ-ոքիի դեպքում հաղթող է ճանաչվում սևերով խաղացող շախմատիստը:

Համաձայն ՖԻԴԵ-ի կանոնադրության` Աշխարհի Գավաթում 1-ին և 2-րդ հորիզոնականները զբաղեցրած շախմատիստներն իրավունք կստանան մասնակցելու հավակնորդների մրցաշարին: