ՀԱՅԱՍՏԱՆԻ ՇԱԽՄԱՏԱՅԻՆ ՖԵԴԵՐԱՑԻԱ

20. 07. 2017
18 : 35
21 Ապրիլ 2017

Գագիկ Հովհաննիսյանն այսօր կդառնար 70 տարեկան

Գագիկ Հովհանիսյանը Հայաստանում և նրա սահմաններից դուրս մեծ հեղինակություն վայելող, բազմավաստակ շախմատային գործիչ և լրագրող էր: Ավելի քան չորս տասնամյակ Գագիկ Հովհաննիսյանը հասարակական աշխատանք է կատարել Հայաստանի շախմատային ֆեդերացիայում` հանդիսանալով ֆեդերացիայի գլխավոր քարտուղարը:

Գագիկ Հովհաննիսյանը հայ մամուլի պատմության մեջ ամենաերկարատև գործունեություն ծավալած հիմնադիր-խմբագիրն էր. 1972-ին նա հիմնադրել է «Շախմատային Հայաստան» հանդեսը և որի գլխավոր խմբագիրն էր ստեղծման պահից:

43 տարի շարունակ, յուրաքանչյուր կիրակի, նա վարում էր «Շախմատ-64» հեղինակային ծրագիրը Հայաստանի հանրային հեռուստատեսությամբ: Գագիկ Հովհաննիսյանը 51 շախմատային և 36 հրապարակախոսական գրքերի հեղինակ է, նա հրապարակել է մոտ 5300 հոդված մամուլում, ունեցել է ավելի քան 4000 հեռուստատեսային ելույթներ:

1994-2010 թվականներին զբաղեցրել է ՖԻԴԵ-ի եվրոպական 5-րդ գոտու նախագահի պաշտոնը:
Աշխարհի սիրող շախմատիստների 6-րդ չեմպիոնն է:
Գագիկ Հովհաննիսյանը Երևանի պետական համալսարանի ժուռնալիստիկայի բաժնի և ֆակուլտետի հիմնադիր դասախոսներից էր:

Գագիկ Հովհաննիսյանը պարգևատրվել է «Շախմատային Օսկար» մրցանակով (1996 թ.), «Մովսես Խորենացի» մեդալով (2007 թ.), ՖԻԴԵ-ի «Ոսկե նշան» պարգևով (2007 թ.), «Գրիբոյեդովի մեդալով» (2010 թ.), արժանացել է ժուռնալիստական «Հավատարմություն թեմային» հանրապետական մրցանակին, իսկ 2012 թվականին` Հայաստանի Հանրապետության վաստակավոր լրագրողի պատվավոր կոչմանը:

Գագիկ Հովհաննիսյանը շախմատի, մամուլի և հեռուստատեսության բնագավառներում իր երկարամյա բեղուն աշխատանքով, մասնագիտական բարձր վարպետությամբ ակտիվորեն նպաստել է այդ ոլորտների զարգազմանը և երկրի հասարակական կյանքի առաջընթացին: