ՀԱՅԱՍՏԱՆԻ ՇԱԽՄԱՏԱՅԻՆ ՖԵԴԵՐԱՑԻԱ

21. 02. 2018
19 : 16
02 Փետրվար 2018

Լևոն Արոնյանը՝ Ջիբրալթար Մասթերսի հաղթող

Մեծ Բրիտանիայում ավարտվեց Ջիբրալթար Մասթերս խոշոր միջազգային մրցաշարը, որին մասնակցում էին 50 երկների 274 շախմատիստ, այդ թվում՝ 92 գրոսմայստեր: Մրցաշարում առաջին դասակարգված շախմատիստն էր հայկական շախմատի առաջատար Լևոն Արոնյանը: Մրցաշարում մասնակիցների թվում էին նաև աշխարհի առաջատար մի շարք այլ շախմատիստներ՝  Մաքսիմ Վաշիե-Լագրավը , Ջիբլարթար Մասթերսի վերջին երեք տարիների հաղթող Հիկարու Նակամուրան  Դավիթ Նավարան, Պենտալա Հարիկրիշնան , Լե Քուան Լիեմը, Դուդա Յան-Քշիշտոֆը, Մայքլ Ադամսը, Վահ Հաոն, Նիկիտա Վիտյուգովը , Վասիլի Իվանչուկը և այլն:
10-րդ տուրից հետո 7 շախմատիստ վաստակեցին 7.5-ական միավոր և կիսեցին 1-7-րդ հորիզոնականները, սակայն մրցաշարի հաղթողը պետք է որոշվեր թայ-բրեյքում, իսկ թայ-բրեյքին թույլատրեցին մասնակցել լրացուցիչ ցուցանիշներով 1-4-րդ հորիզոնականները զբաղեցրած շախմատիստներին՝ Լևոն Արոնյանին, Մաքսիմ Վաշիե-Լագրավին, Հիկարու Նակամուրային և Ռիչարդ Ռապորտին: Թայ-բրեյքի կիսաեզրափակչում Արոնյանը վստահորեն հաղթեց Ռիչարդ Ռապորտին, իսկ Վաշիե-Լագրավն ուժեղ գտնվեց Նակամուրայից: Ջիբրալթար Մասթերսի թայ-բրեյքի եզրափակիչը անցյալ տարի կայացած Աշխարհի Գավաթի խաղարկության կիսաեզրափակչի կրկնությունն էր՝ միմյանց դեմ մրցում էին Լևոն Արոնյանը և Մաքսիմ Վաշիե-Լագրավը: Ինչպես և Գավաթի խաղարկության կիսաեզրափակչում, այս անգամ ևս դրամատիկ և լարված պայքարում Արոնյանը ուժեղ գտնվեց Լագրավից: Ասյպիսով, Արոնյանը երկրորդ անգամ դարձավ այս հեղինակավոր մրցաշարի հաղթող: Առաջին անգամ Արոնյանը Ջիբրալթար Մասթերսի հաղթող էր դարձել 2005 թվականին:
Մրցաշարում հաջող ելույթ ունեցավ նաև  Հայաստանի կանանց հավաքականի անդամ Լիլիթ Մկրտչյանը, ով 10 հնարավորից վաստակեց 5.5 միավոր և 11 կետով բարձրացրեց իր անհատական վարկանիշը: