ՀԱՅԱՍՏԱՆԻ ՇԱԽՄԱՏԱՅԻՆ ՖԵԴԵՐԱՑԻԱ

21. 10. 2017
03 : 27
27 Սեպտեմբեր 2017

Կարեն Գրիգորյանը՝ «Երևան Օփեն»-ի հաղթող

Հայաստանի շախմատի ակադեմիայում ավարտվեց Երևան Օփեն միջազգային մրցաշարը: «Երևան օփեն» շախմատի միջազգային մրցաշարի հանդիսավոր փակման արարողությանը ներկա են գտնվել Երևանի քաղաքապետ, Երևանի շախմատի ֆեդերացիայի նախագահ Տարոն Մարգարյանը, Հայաստանի շախմատի ֆեդերացիայի նախագահի տեղակալ Լևոն Յոլյանը, Հայաստանի շախմատի ֆեդերացիայի գործադիր տնօրեն Հրաչիկ Թավադյանը, բազմաթիվ շախմատեսերներ և հյուրեր:
«Երևան Օփեն» –ի հաղթող է դարձել Հայաստանը ներկայացնող գրոսմայստեր Կարեն Գրիգորյանը: 2-րդ մրցանակակիր է դարձել Իրանի ներկայացուցիչ Ամին Թաբաթաբեյը, իսկ Հայաստանի մեկ այլ ներկայացուցիչ Արման Միքայելյանը եզրափակել է լավագույն եռյակը:

Մրցաշարի շրջանակում, բացի հիմնական մրցանակներից, սահմանվել էին նաև հատուկ մրցանակներ` տարբեր անվանակարգերում:
Ներկաներին ուղղված իր ողջույնի խոսքում Երևանի քաղաքապետ Տարոն Մարգարյանը նախ շնորհավորել է բոլորին Երևանի պատվավոր քաղաքացի Լևոն Արոնյանի՝ երկրորդ անգամ աշխարհի գավաթակիր դառնալու առթիվ:
«Իսկապես հպարտություն է ունենալ նման շախմատիստ, ով հեղինակավոր տարբեր մրցաշարերում ու աշխարհի գավաթի խաղարկությունում շարունակում է բարձր պահել մեր երկրի պատիվը: Շնորհավորում եմ նաև «Երևան օփեն 2017» շախմատի միջազգային մրցաշարի հաղթողներին: Ուրախությամբ պետք է փաստենք, որ այս տարի մրցաշարին մասնակցում էին արդեն 13 երկրների ներկայացուցիչներ, և վստահ եմ, որ տարեցտարի այս ցուցանիշը կավելանա: Դա, անշուշտ, կախված է նաև Երևանի շախմատի ֆեդերացիայի հետևողական աշխատանքից, ինչը վստահաբար կարվի, ու հաջորդող տարիներին միջազգային այս մրցաշարում մենք կտեսնենք ավելի շատ թվով մասնակից երկրներ»,- ընդգծել է քաղաքապետը: