ՀԱՅԱՍՏԱՆԻ ՇԱԽՄԱՏԱՅԻՆ ՖԵԴԵՐԱՑԻԱ

19. 08. 2017
00 : 16
19 Ապրիլ 2017

Հայաստանի պատանիների և աղջիկների 2017թ. առաջնության եզրափակիչ մրցաշարերը հատեցին հասարակածը

Ապրիլի 13-ին Հայաստանի շախմատի ակադեմիայում մեկնարկած Հայաստանի պատանիների և աղջիկների 2017թ. առաջնության եզրափակիչ մրցաշարերը հատեցին հասարակածը: Առաջնություններն անցկացվում են 5 տարիքային խմբերով: Թե´ պատանիների, թե´ աղջիկների մրցաշարերում արդեն ի հայտ են եկել մրցաշարերի առաջատարների խմբերը, իսկ ենթախմբերի գերակշռող մասում կան միանձնյա առաջատարներ:

Մինչև 10 և 12 տարեկան պատանիների և աղջիկների ենթախմբերում տեղի են ունեցել նախատեսված 11 տուրերից 7-ի հանդիպումները, իսկ մինչև 14 և 16 տարեկան պատանիների և աղջիկների, ինչպես նաև մինչև 18 տարեկան պատանիների ենթախմբերում` նախատեսված 9 տուրերից 5-ի պարտիաները, իսկ մինչև 18 տարեկան աղջիկների մրցաշարում` նախատեսված 7 տուրերից 5-ի պարտիաները:

Մինչև 10 տարեկան պատանիների առաջնությունում միանձնյա առաջատարն է Ռոբերտ Փիլիպոսյանը, ով 7 հնարավորից վաստակել է 6.5 միավոր, 5.5 միավորով 2-րդ հորիզոնականում է ընթանում Նարեկ Խաչատրյանը:

Մինչև 10 տարեկան աղջիկների ենթախմբում առաջատարն է 6 միավոր վաստակած Անահիտ Մուրադյանը, իսկ 2-րդ հորիզոնականում ընթացող Թամար Գոգինյանն իր ակտիվում ունի 5 միավոր:

Մինչև 12 տարեկան պատանիների առաջնության միանձնյա առաջատարն է Արշակ Մելքոնյանը: Համլետ Բրույանն ու Ռոբերտ Մուրադյանը առաջատարից հետ են մնում կեսական միավորով և կիսում 2-3-րդ հորիզոնականները:

Մինչև 12 տարեկան աղջիկների մրցաշարի առաջատարն է 5.5 միավոր վաստակած Աստղիկ Հակոբյանը, իսկ Միլենա Գասպարյանը և Աննա Պողոսյանը առաջատարից հետ են մնում կեսական միավորով:

Մինչև 14 տարեկան պատանիների մրցաշարային աղյուսակը գլխավորում է 5 հնարավորից 4.5 միավոր վաստակած Արմեն Բարսեղյանը,  իսկ Էդուարդ Հակոբյանը և Ալեն Երեմյանը վաստակել են 4-ական միավոր:

Մինչև 14 տարեկան աղջիկների պայքարում 4.5 միավորով  առաջատարն է կանանց վարպետության թեկնածու Մարիամ Մկրտչյանը,իսկ  Վերոնիկա Խաչատրյանն ու Մանե Հովհաննիսյանը առաջատարին զիջում են մեկական միավորով:

Մինչև 16 տարեկան պատանիների մրցաշարի առաջատարն է 5 հնարավորից նույնքան միավոր վաստակած միջազգային վարպետ Շանթ Սարգսյանը: 2-3-րդ հորիզոնականներում ընթացող Հակոբ Հակոբյանն ու ՖԻԴԵ-ի վարպետ Դավիթ Միրզոյանը առաջատարից հետ են մնում 1.5-ական միավորով:

Մինչև 16 տարեկան աղջիկների ենթախմբի միանձնյա առաջատարն է Աննա Սարգսյանը, ով 5 հնարավորից վաստակել է 5 միավոր, 2-րդ հորիզոնականում ընթացող Արփինե Գրիգորյանն իր ակտիվում ունի 4.5 միավոր:

Մինչև 18 տարեկան պատանիների առաջնության առաջատարն է 16-ամյա միջազգային վարպետ Արամ Հակոբյանը, ով 5 հնարավորից վաստակել է 4.5 միավոր, իսկ 2-րդ հորիզոնականում է ընթանում 13-ամյա ՖԻԴԵ-ի վարպետ Մամիկոն Ղարիբյանը:

Մինչև 18 տարեկան աղջիկների մրցաշարում Մարիամ Ավետիսյանն ու Սոնա Ասատրյանը 5 հնարավորից վաստակել են 4-ական միավոր և գլխավորում են մրցաշարային աղյուսակը: