ՀԱՅԱՍՏԱՆԻ ՇԱԽՄԱՏԱՅԻՆ ՖԵԴԵՐԱՑԻԱ

25. 06. 2017
23 : 12
20 Հունվար 2017

Հովհաննես Գաբուզյանը՝ Հայաստանի շախմատի տղամարդկանց չեմպիոն

Ավարտվեց 2017 թվականի Հայաստանի շախմատի տղամարդկանց առաջնությունը: Գերլարված ընթացք ունեցած մրցաշարի վերջին տուրից առաջ 5 շախմատիստ՝ Տիգրան Լ. Պետրոսյանը, Զավեն Անդրիասյանը, Արման Փաշիկյանը, Հովհաննես Գաբուզյանն ու Հայկ Մարտիրոսյանը վաստակել էին 4.5-ական միավոր և գլխավորում էին մրցաշարային աղյուսակը:  Վերջին տուրում առաջատարներից երկուսը՝ Հովհաննես Գաբուզյանն ու Հայաստանի 2016 թվականի չեմպիոն Զավեն Անդրիասյանը մրցում էին միմյանց դեմ: Հենց այս պարտիայում էլ որոշվեց չեմպիոնի անունը: Հովհաննես Գաբուզյանը, ով մրցաշարի մեկնարկային 5 տուրերում վաստակել էր միայն 1.5 միավոր, վերջին տուրում տոնեց 4-րդ անընդմեջ հաղթանակը և հռչակվեց Հայաստանի 2017 թվականի չեմպիոն և ընդգրկվեց Հայաստանի տղամարդկանց հավաքականի կազմ:
Վերջին տուրում առաջատարներից Արման Փաշիկյանը պարտվեց Սամվել Տեր-Սահակյանին, իսկ Տիգրան Լ. Պետրոսյանն ու Հայկ Մարտիրոսյանը ոչ-ոքիով ավարտեցին իրենց պարտիաները: Հաշտություն կնքվեց նաև Կարեն Գրիգորյան – Ռոբերտ Հովհաննիսյան պարտիայում:

Այսպիսով Հովհաննես Գաբուզյանը, 9 հնարավորից վաստակելով 5.5 միավոր, դարձավ Հայաստանի չեմպիոն, 5 միավոր վաստակած Տիգրան Լ. Պետրոսյանը գրավեց 2-րդ հորիզոնականը, նույնքան միավոր վաստակած Հայկ Մարտիրոսյանը եզրափակեց լավագույն եռյակը: