ՀԱՅԱՍՏԱՆԻ ՇԱԽՄԱՏԱՅԻՆ ՖԵԴԵՐԱՑԻԱ

21. 11. 2017
03 : 12
06 Սեպտեմբեր 2017

Հրանտ Մելքումյանը և Ռոբերտ Հովհաննսիյանը դուրս մնացին Աշխարհի Գավաթի խաղարկությունից

Թբիլիսում տեղի ունեցավ Աշխարհի Գավաթի առաջին շրջանի թայ-բրեյքը: Թայ-բրեյքում Հայաստանի երկու ներկայացուցիչները՝ Հրանտ Մելքումյանը և Ռոբերտ Հովհաննիսյանը, պարտվեցին Բորիս Գրաչովին և Մաքսիմ Ռոդշտեյնին: Հատկապես ցավալի էր Մելքումյանի պարտությունը. ով թայ-բրեյքի երկու պարտիաներում էլ ուներ մեծ առավելություն, սակայն առաջին պարտիան ավարտվեց ոչ-ոքի արդյունքով, իսկ երկրորդում Մելքումյանը վերջնամասում վրիպում թույլ տվեց և պարտվեց:
Թայ-բրեյքում Աշխարհի Գավաթի խաղարկության երկրորդ փուլի ուղեգիր նվաճեց ԱՄՆ ներկայացնող մեր հայրենակից, 17-ամյա գրոսմայստեր Սամուել Սևյանը, ով առավելության հասավ բազմափորձ հանրահայտ գրոսմայստեր Նիսիպիանու Լիվիու-Դիետերի նկատմամբ:
Այսօր տեղի կունենան Աշխարհի Գավաթի խաղարկության երկրորդ փուլի առաջին պարտիաները:
Երկրորդ փուլում Լևոն Արոնյանի մրցակիցն է լինելու Չինաստանը ներկայացնող, աշխարհի ուժեղագույն կին շախմատիստուհի Հոու Յիֆանը, իսկ Սամուել Սևյանը կմրցի Չինաստանի մեկ այլ ներկայացուցչի՝ Լի Չաոյի հետ:

Աշխարհի Գավաթի պարտիաները մեկնարկում են Երևանի ժամանակով 15:00-ին:

Աշխարհի Գավաթի խաղարկությունն անցկացվում է սեպտեմբերի 2-28-ը:
Հանգստյան օրերն են սեպտեմբերի 18-ը և 22-ը:

Մրցաշարն անցկացվում  է նոկաուտ համակարգով՝ մրցախաղում պարտվողը դուրս է մնում հետագա պայքարից: Խաղարկությանը մասնակցում են 128 շախմատիստ:

Աշխարհի գրեթե բոլոր ուժեղագույն շախմատիստները՝  Մագնուս Կարլսենը, Լևոն Արոնյանը, Մաքսիմ Վաշիե-Լագրավը, Ուեսլի Սոն, Վլադիմիր Կրամնիկը, Հիկարու Նակամուրան, Շահրիյար Մամեդյարովը, Ալեքսանդր Գրիշչուկը, Վիշվանաթան Անանդը, Դին Լիժենը, Յու Յանյին, Սերգեյ Կարյակինը, Անիշ Գիրին, Վեյ  Յին, Լի Չաոն, Ռադոսլավ Վոյտաշեկը, Յան Նեպոմնյաշչին, Պյոտր Սվիդլերը,Պենտալա Հարիկրիշնան, Մայքլ Ադամսը, մասնակցում են մրցաշարին:

Ընդհանուր մրցանակային ֆոնդը կազմում 1.600.000 ԱՄՆ դոլար:

Բացի եզրափակչից (խաղարկվելու է 4 պարտիա), բոլոր փուլերի մրցախաղերը բաղկացած են 2 պարտիայից և անցնում են հետևյալ ժամակարգով՝ 90 րոպե առաջին 40 քայլի համար, այնուհետև 30 րոպե հավելում, առաջին քայլից սկսած յուրաքանչյուր քայլի համար 30 վայրկյան հավելումով: Մրցախաղում ոչ-ոքիի դեպքում խաղարկվում է թայ-բրեյք՝  2 պարտիա  25 րոպե + 10 վայրկյան յուրաքանչյուր քայլի համար ժամակարգով, կրկին ոչ-ոքիի դեպքում՝ 2 պարտիա 10 րոպե + 10 վայրկյան յուրաքանչյուր քայլի համար, կրկին հավասար արդյունքի դեպքում ևս 2 պարտիա՝ 5 րոպե + 3 վայրկյան յուրաքանչյուր քայլի համար: Այս մրցախաղում ոչ-ոքիի դեպքում խաղարկվում է որոշիչ պարտիա (արմագեդոն), որտեղ սպիտակներին տրվում է 5 րոպե, իսկ սևերին 4 րոպե՝ 61-րդ քայլից սկսած յուրաքանչյուր քայլի համար 3 վայրկյան հավելումով: Որոշիչ պարտիայում ոչ-ոքիի դեպքում հաղթող է ճանաչվում սևերով խաղացող շախմատիստը:

Համաձայն ՖԻԴԵ-ի կանոնադրության` Աշխարհի Գավաթում 1-ին և 2-րդ հորիզոնականները զբաղեցրած շախմատիստներն իրավունք կստանան մասնակցելու հավակնորդների մրցաշարին: