ՀԱՅԱՍՏԱՆԻ ՇԱԽՄԱՏԱՅԻՆ ՖԵԴԵՐԱՑԻԱ

11. 12. 2017
21 : 09
23 Նոյեմբեր 2017

Ծաղկաձորում կայացավ Հայաստանի ութակի չեմպիոն, գրոսմայստեր Աշոտ Անաստասյանի հուշամրցաշարը

Երեկ Ծաղկաձորում կայացավ Հայաստանի ութակի չեմպիոն, գրոսմայստեր Աշոտ Անաստասյանի հուշամրցաշարը, որին մասնակցեցին 14 երկրների 200 շախմատիստ: Մասնակիցների թվում էին հայկական շախմատի լեգենդ Ռաֆայել Վահանյանը, եռակի Օլիմպիական չեմպիոն Գաբրիել Սարգսյանը, կրկնակի Օլիմպիական չեմպիոններ Արտաշես Մինասյանը և Տիգրան Լ. Պետրոսյանը, աշխարհի և Եվրոպայի պատանեկան չեմպիոններ, բազմաթիվ գրոսմայստերներ ու միջազգային վարպետներ: Հուշամրցաշարի մեկնարկից առաջ ցուցադրվեց Աշոտ Անաստասյանի մասին պատմող կարճ տեսաֆիլմ, որը պատրաստել էր հայտնի սպորտային լրագրող Ռուդիկ Բարսեղյանը: Այնուհետև մասնակիցներին ողջույնի խոսքով դիմեց  Հայաստանի շախմատի ֆեդերացիայի նախագահի առաջին տեղակալ Սմբատ Լպուտյանը:

«Աշոտ Անաստասյանը թողել է մեծ շախմատային ժառանգություն: Անաստասյանը համաշխարհային մակարդակի շախմատիստ էր և  հիասքանչ մարդ: Մենք չէինք էլ կարող պատկերացնել, որ այսքան մասնակից կունենանք: Ուրախ եմ, որ Աշոտ Անաստասյանի հուշամրցաշարը մոտ 200 մասնակից ունի, ինչը խոսում է Աշոտ Անաստասյանի հանդեպ մեծ հարգանգի մասին»,- հուշամրցաշարի մեկնարկին նշեց Լպուտյանը:

Նույն օրը երեկոյան կայացած հուշամրցաշարի փակման հանդիսավոր արարողությանը ներկա  գտնվեց Հայաստանի Հանրապետության Նախագահ, Հայաստանի շախմատի ֆեդերացիայի նախագահ Սերժ Սարգսյանը:

Աշոտ Անաստասյանի հուշամրցաշարի  հաղթող դարձավ գրոսմայստեր Արման Փաշիկյանը, Սերգեյ Ժիգալկոն գրավեց երկրորդ հորիզոնականը, իսկ Ռոբերտ Հովհաննիսյանը եզրափակեց լավագույն եռյակը: Մրցաշարում սահմանված էին նաև հատուկ մրցանակներ: Վետերան շախմատիստների մեջ լավագույն արդյունքը ցույց տվեց Արտաշես Մինասյանը, կանանց մեջ առաջինը դարձավ Էլինա Դանիելյանը, իսկ մինչև 12 տարեկանների պայքարում ամենաբարձր արդյունքը գրանցեց Սինդարով Ջավոհիրը: Մրցաշարի հաղթողներին պարգևները հանձնեց ՀՇՖ նախագահի առաջին տեղակալ Սմբատ Լպուտյանը:

Աշոտ Համլետի Անաստասյան  (1964 – 2016):
Հայաստանի Չեմպիոնի տիտղոսը նվաճել է 1983, 1985, 1986, 1987, 1988, 1992, 1994, 2005 թվականներին,  վեց անգամ մասնակցել է շախմատային օլիմպիադաների՝  1992, 1994, 1996, 1998, 2000, 2002 թվականներին:

1997, 2001 և 2005 թվականներին Հայաստանի հավաքականի կազմում դարձել է աշխարհի թիմային առաջնության բրոնզե մեդալակիր (իսկ 1993 թվականին պահեստային խաղատախտակի վրա դարձել է անհատական բրոնզե մեդալակիր), 1992 և 2002 թվականներին` համաշխարհային օլիմպիադայի բրոնզե մեդալակիր, իսկ 1999 թվականին Եվրոպայի չեմպիոն (լավագույն արդյունքը 3-րդ խաղատախտակի վրա, լավագույնը պահեստային խաղատախտակի վրա 1997 թվականի առաջնությունում, 3-րդը պահեստային խաղատախտակի վրա 2005 թվականի առաջնությունում)։

1995 թվականին Անաստասյանը «Երևան» թիմի կազմում դարձել է Եվրոպայի ակումբային գավաթակիր։

2016 թվականի հուլիսին Գերմանիայի Դրեզդեն քաղաքում կայացած աշխարհի վետերանների թիմային առաջնությունում Հայաստանի հավաքականի կազմում  դարձել է աշխարհի փոխչեմպիոն։