ՀԱՅԱՍՏԱՆԻ ՇԱԽՄԱՏԱՅԻՆ ՖԵԴԵՐԱՑԻԱ

21. 11. 2017
03 : 12
07 Սեպտեմբեր 2017

Լևոն Արոնյանը ոչ-ոքի խաղաց Հոու Յիֆանի հետ

Թբիլիսիում տեղի ունեցան Աշխարհի Գավաթի խաղարկության 2-րդ շրջանի առաջին պարտիաները: Լևոն Արոնյանը սև խաղաքարերով ոչ-ոքի խաղաց Հոու Յիֆանի հետ: Հաշտություն կնքվեց նաև Սամուել Սևյան – Լի Չաո պարտիայում: 2-րդ շրջանի առաջին պարտիաներում սպասելի հաղթանակներ տոնեցին Մագնուս Կարլսենը, Մաքսիմ Վաշիե-Լագրավը,Դավիդ Նավարան, Վլադիմիր Կրամնիկը, Վլադիմիր Ֆեդոսեևը և Վիդիթ Սանթոշ Գուջրաթին: Միակ անակնկալը գրանցվեց Վիշվանաթան Անանդ- Անտոն Կովալյով պարտիայում, որում սևերով հանդես եկող Կովալյովը պարտության մատնեց աշխարհի նախկին չեմպիոնին: Այսօր տեղի կունենան 2-րդ շրջանի 2-րդ պարտիաները:

 Աշխարհի Գավաթի պարտիաները մեկնարկում են Երևանի ժամանակով 15:00-ին:

Աշխարհի Գավաթի խաղարկությունն անցկացվում է սեպտեմբերի 2-28-ը:
Հանգստյան օրերն են սեպտեմբերի 18-ը և 22-ը:

Մրցաշարն անցկացվում  է նոկաուտ համակարգով՝ մրցախաղում պարտվողը դուրս է մնում հետագա պայքարից: Խաղարկությանը մասնակցում են 128 շախմատիստ:

Աշխարհի գրեթե բոլոր ուժեղագույն շախմատիստները՝  Մագնուս Կարլսենը, Լևոն Արոնյանը, Մաքսիմ Վաշիե-Լագրավը, Ուեսլի Սոն, Վլադիմիր Կրամնիկը, Հիկարու Նակամուրան, Շահրիյար Մամեդյարովը, Ալեքսանդր Գրիշչուկը, Վիշվանաթան Անանդը, Դին Լիժենը, Յու Յանյին, Սերգեյ Կարյակինը, Անիշ Գիրին, Վեյ  Յին, Լի Չաոն, Ռադոսլավ Վոյտաշեկը, Յան Նեպոմնյաշչին, Պյոտր Սվիդլերը,Պենտալա Հարիկրիշնան, Մայքլ Ադամսը, մասնակցում են մրցաշարին:

Ընդհանուր մրցանակային ֆոնդը կազմում 1.600.000 ԱՄՆ դոլար:

Բացի եզրափակչից (խաղարկվելու է 4 պարտիա), բոլոր փուլերի մրցախաղերը բաղկացած են 2 պարտիայից և անցնում են հետևյալ ժամակարգով՝ 90 րոպե առաջին 40 քայլի համար, այնուհետև 30 րոպե հավելում, առաջին քայլից սկսած յուրաքանչյուր քայլի համար 30 վայրկյան հավելումով: Մրցախաղում ոչ-ոքիի դեպքում խաղարկվում է թայ-բրեյք՝  2 պարտիա  25 րոպե + 10 վայրկյան յուրաքանչյուր քայլի համար ժամակարգով, կրկին ոչ-ոքիի դեպքում՝ 2 պարտիա 10 րոպե + 10 վայրկյան յուրաքանչյուր քայլի համար, կրկին հավասար արդյունքի դեպքում ևս 2 պարտիա՝ 5 րոպե + 3 վայրկյան յուրաքանչյուր քայլի համար: Այս մրցախաղում ոչ-ոքիի դեպքում խաղարկվում է որոշիչ պարտիա (արմագեդոն), որտեղ սպիտակներին տրվում է 5 րոպե, իսկ սևերին 4 րոպե՝ 61-րդ քայլից սկսած յուրաքանչյուր քայլի համար 3 վայրկյան հավելումով: Որոշիչ պարտիայում ոչ-ոքիի դեպքում հաղթող է ճանաչվում սևերով խաղացող շախմատիստը:

Համաձայն ՖԻԴԵ-ի կանոնադրության` Աշխարհի Գավաթում 1-ին և 2-րդ հորիզոնականները զբաղեցրած շախմատիստներն իրավունք կստանան մասնակցելու հավակնորդների մրցաշարին: