ՀԱՅԱՍՏԱՆԻ ՇԱԽՄԱՏԱՅԻՆ ՖԵԴԵՐԱՑԻԱ

21. 11. 2017
03 : 13
07 Հոկտեմբեր 2017

Chessify շախմատային ստարտափ ծրագիրը կներկայացնի Հայաստանը Seedstars World միջազգային մրցույթում

Մայքրոսոֆթ ինովացիոն կենտրոն Հայաստանը, ՎիվաՍել-ՄՏՍ-ի հետ համատեղ, Երևանում կազմակերպել էր Seedstars World միջազգային մրցույթի երևանյան փուլը։
Միջոցառման ընթացքում 70 հայտադիմումից ընտրված 11 ստարտափ ներկայացրել է իր արտադրանքը միջազգային և տեղական մասնագետներից կազմված ժյուրիի անդամներին։ Ժյուրիի անդամները ներկայացված պրոդուկտները գնահատել են մի քանի չափանիշով՝ թիմը, առկա վիճակը, կիրառելիությունը ավելի մեծ շուկայում, ստեղծած արժեքը և այլն։ Հատկապես մեծ հետաքրքրություն են ներկայացրել արհեստական բանականության և մեքենայացված ուսուցման հենքով արտադրանքները, որոնք լուծումներ են առաջարկում առողջապահության, կրթության և ֆինանսների կառավարման գործում:
Ժյուրիի որոշման արդյունքում Շվեյցարիայում կայանալիք  Seedstars World միջազգային մրցույթին Հայաստանը կներկայանա Chessify թիմով, որի ստեղծած արտադրանքն հնարավորություն է տալիս հեռախոսով գրքից նկարել խնդիրը, թվայնացնել ու աշխատել դրա վրա. տեղաշարժել խաղաքարերը, վիզուալ ավելի հեշտ պատկերացնել հետագա քայլերը: Ներկայումս այն ունի արդեն 100,000-ից ավել ներբեռնում։ Միջազգային մրցույթում ստարտափը հնարավորություն կունենա իր արտադրանքը ներկայացնելու հնարավոր ներդրողների, գործընկերների դատին։ Seedstars World  միջազգային մրցույթն աշխարհի տարբեր շրջաններից 12 լավագույն ստարտափների մրցակցություն է, որը ներառում է 65-ից ավել զարգացող շուկաներ։ Հաղթողը կստանա մինչեւ $ 500,000-ի ֆինանսավորում:

Chessify ստարտափի նպատակն է տեխնոլոգիական լավագույն զարգացումները հասանելի դարձնել շախմատային աշխարհին: Այս նպատակով, Chessify ընկերությունը ստեղծել է համանուն հեռախոսային հավելված, որի գլխավոր հնարավորություններից են.

գրքերից կամ էկրանից շախմատային դիրքերի սկանավորումը եւ դրանց վերլուծումը
գլխավոր մրցաշարերի ուղիղ ցուցադրումը
դժվարության տարբեր մակարդակներ ունեցող համակարգչի հետ խաղալը:

Սկանավորման ունակությունը հավասարը չունի շուկայում: Ներկայումս Chessify-ի թիմը աշխատում է նաեւ 3D ճանաչման վրա, ինչը հնարավոր կդարձնի իսկական տախտակի սկանավորումը: Հաջողության դեպքում, այս աննախադեպ հնարավորությունը նոր դարաշրջան կհամարվի ինչպես շախմատային, այնպես էլ  IT ոլորտի համար: Թիմը նախատեսում է աշխարհին զարմացնել մի քանի այլ նորարարություններով ևս` կապված AI (արհեստական բանականություն) եւ AR (ընդլայնված իրողություն) տեխնոլոգիաների հետ:
Բացի հեռախոսային հավելվածից, Chessify-ը պրոֆեսիոնալ շախմատիստներին տրամադրում է ամպային ծառայություն, որը միջինում 20 անգամ արագացնում է Stockfish 8 շախմատային ծրագրի աշխատանքը: Փլագինը կարելի է ներբեռնել Chessify-ի պաշտոնական կայքից ` chessify.me
Հեռախոսային հավելվածը հասանելի է Play Store- ում https://play.google.com/store/apps/details?id=com.fimetech.chessfimee&hl=ru
Շուտով այն հնարավորություն կունենան ներբեռնելու նաև iOS համակարգի օգտատերերը: