ՀԱՅԱՍՏԱՆԻ ՇԱԽՄԱՏԱՅԻՆ ՖԵԴԵՐԱՑԻԱ

23. 09. 2017
20 : 30
06 Սեպտեմբեր 2017

Մեկնարկեց Եվրոպայի պատանեկան առաջնությունը

Ռումինիայում Մամայա քաղաքում մեկնարկեց Եվրպայի պատանիների և աղջիկների առաջնությունը: Մրցաշարին Հայաստանը մասնակցում է մեծ կազմով. մեր պատվիրակության մեջ են 36 շախմատիստ: Հայաստանը ներկայացնող մասնակիցների թվում են աշխարհի 2016 թվականի Մ 16 տարեկանների չեմպիոն Հայկ Մարտիրոսյանը, ով այս տարի հանդես կգա Մ 18 տարեկանների առաջնությունում և Եվրոպայի 2016 թվականի Մ 12 տարեկանների չեմպիոն Մամիկոն Ղարիբյանը, ով այս տարի հանդես կգա Մ 14 տարեկանների ենթախմբում:
Երեկ տեղի ունեցավ մրցաշարի առաջին տուրը: Մեկնարկային տուրում հաճելի անակնկալ մատուցեց մինչև 14 տարեկանների խմբում հանդես եկող Ալեն Երեմյանը: Մեր շախմատիստը լարված պայքարում առավելության հասավ այս ենթախմբում առաջին համարի տակ հանդես եկող Թուրքիայի ներկայացուցիչ Օզենիր Էկին Բարիսի նկատմամբ:

Մրցաշարը անհաջող մեկնարկեց մինչև 18 տարեկանների խմբում առաջին համարի տակ հանդես եկող Հայկ Մարտիրոսյանը, ով պարտվեց Մակեդոնիան ներկայացնող Տոնի Լազովին: Ընդհանուր առմամբ մեր 36 պատվիրակներից 19-ը հաղթանակներ տոնեցին, 6-ը իրենց պարտիաներն ավարտեցին հաշտությամբ, իսկ 11 շախմատիստ պարտվեցին:
Մեկնարկային տուրում Հայաստանի պատանի շախմատիստներին քաջալերելու էր եկել Ռումինիայում Հայաստանի փոխհյուպատոս Արամ Գրիգորյանը:

Այսօր տեղի կունենա մրցաշարի երկրորդ տուրը:

Արդյունքներ
Ուղիղ միացում
Պաշտոնական կայք

Եվրոպայի 2017 թվականի պատանիների և աղջիկների առաջնությունը տեղի է ունենում սեպտեմբերի 4-15-ը՝ Ռումինիայի Մամայա քաղաքում:  Առաջնությունն անցկացվում է հետևյալ տարիքային խմբերով՝ Մ 8, Մ 10, Մ 12, Մ 14, Մ 16 և Մ 18: Պատանիների և աղջիկների մրցաշարերն անցկացվում են առանձին:

Մրցաշարում Հայաստանը ներկայացնում են 36 պատանի շախմատիստ: