Կապանում ամփոփվեց ՀՀ դպրոցականների շախմատի հոբելյանական 20-րդ օլիմպիադայի եզրափակիչ փուլը

Սեպտեմբերի 12-ին Կապանում ամփոփվեց ՀՀ դպրոցականների շախմատի հոբելյանական 20-րդ օլիմպիադայի եզրափակիչ փուլը։

Մի քանի օր շարունակ 14 լավագույն դպրոցական թիմեր մրցեցին օլիմպիադայի հաղթողի կոչման համար՝ Կապանում միավորելով Հայաստանի տարբեր համայնքների դպրոցականներին, նրանց մարզիչներին ու ուսուցիչներին։

20-րդ օլիմպիադան նաև 20 տարվա պատմության մի կարևոր կանգառ էր։ Տարիների ընթացքում այս հարթակում հանդիպել են հազարավոր երեխաներ, ձևավորվել են ընկերություններ, անցել են մրցաշարեր, և ամենակարևորը՝ դպրոցական շախմատը շարունակել է իր ճանապարհը։

Փակման արարողությանը ներկա էին Հայաստանի շախմատի ակադեմիայի հիմնադիր-գլխավոր տնօրեն, ՄԳ Սմբատ Լպուտյանը, Հայկական բարեգործական ընդհանուր միության հումանիտար և կամավորական ծրագրերի տնօրեն Ինեսսա Մարգարյանը և Սյունիքի շախմատի ֆեդերացիայի նախագահ Արտուր Խոջաբաղյանը։

Արարողության ընթացքում հատուկ շնորհակալագրերի արժանացան Վահագն Խաչատրյանը՝ օլիմպիադայի կայացմանն ու շարունակական զարգացմանը ունեցած մասնակցության համար և Սամվել Արզումանյանը՝ դպրոցականների շախմատի զարգացման գործում իր երկարամյա աշխատանքի համար։

Իսկ այս տարվա լավագույն եռյակն ունի հետևյալ տեսքը.
1-ին տեղ՝ Երևանի №77 հիմնական դպրոց
2-րդ տեղ՝ «Մխիթար Սեբաստացի» կրթահամալիր
3-րդ տեղ՝ Այնթապի №1 միջնակարգ դպրոց

Շնորհավորում ենք հաղթողներին և բոլոր մասնակիցներին։

Առանձնահատուկ շնորհակալություն ենք հայտնում Օլիմպիադայի գլխավոր հովանավոր AGBU Armenia-ին և ՀՀ կրթության, գիտության, մշակույթի և սպորտի նախարարությանը՝ դպրոցական շախմատի զարգացմանն ու այս նախաձեռնության շարունակական իրականացմանը ցուցաբերած աջակցության և տարիների համագործակցության համար, ինչպես նաև Օլիմպիադայի անցկացմանն աջակցած Կապանի համայնքապետարանին, Կապանի Մշակույթի Կենտրոնին և Սյունիքի մարզպետարանին։

Հաջողություն մեր դպրոցական թիմերին FIDE ISCF World Schools Team Championship-ում, իսկ մենք կհանդիպենք հաջորդ տարի։