Հայաստանի տղամարդկանց հավաքականը առավելության է հասել Ադրբեջանի նկատմամբ

Հայաստանի շախմատի տղամարդկանց հավաքականը հաղթել է Ադրբեջանի հավաքականին:

Շախմատի համաշխարհային 46-րդ օլիմպիադայի 9-րդ խաղափուլում Հայաստանի հավաքականը 2.5:1.5 հաշվով առավելության է հասել Ադրբեջանի նկատմամբ։

Թիմին հաղթական միավոր է բերել գրոսմայստեր Գաբրիել Սարգսյանը՝ հաղթելով գրոսմայստեր Ռաուֆ Մամեդովին։

Գրոսմայստերներ Հայկ Մարտիրոսյանի, Ռոբերտ Հովհաննիսյանի և Շանթ Սարգսյանի խաղերն ավարտվել են ոչ-ոքի արդյունքով:

Այսօր Հայաստանի կանանց հավաքականը 1:3 հաշվով զիջեց Չինաստանի թիմին:

9 խաղափուլից հետո Հայաստանի տղամարդկանց հավաքականը 18 հնարավորից ունի 15 միավոր և գտնվում է 4-րդ հորիզոնականում, իսկ կանանց հավաքականը 14 միավորով 6-րդ հորիզոնականում է։

Օլիմպիադայի ավարտին մնացել է երկու խաղափուլ։

10-րդ խաղափուլում Հայաստանի տղամարդկանց հավաքականը կմրցի Ուզբեկստանի հավաքականի հետ, իսկ կանանց հավաքականը՝ Հունաստանի հավաքականի հետ:

Մաղթում ենք հաջողություն մեր շախմատիստներին: