Հայաստանի տղամարդկանց հավաքականը առավելության է հասել Անգլիայի հավաքականի նկատմամբ

Հայաստանի հավաքականները շարունակում են մնալ առաջատարների շարքում շախմատի համաշխարհային 45-րդ օլիմպիադայում:

7-րդ խաղափուլում Հայաստանի տղամարդկանց հավաքականը 2.5:1.5 հաշվով առավելության է հասել Անգլիայի հավաքականի նկատմամբ:

Թիմին հաղթական միավոր է բերել Հայկ Մարտիրոսյանը:

Շանթ Սարգսյանի, Գաբրիել Սարգսյանի և Ռոբերտ Հովհաննիսյանի խաղերն ավարտվել են ոչ-ոքի արդյունքով:

Հայաստանի տղամարդկանց հավաքականը կիսում է 3-6-րդ հորիզոնականները Ուզբեկստանի, Հունգարիայի և Սերբիայի հավաքականների հետ: Միանձնյա առաջատարը Հնդկաստանի հավաքականն է, իսկ երկրորդ հորիզոնականում է Իրանի հավաքականը։

Հաջորդ՝ 8-րդ խաղափուլում Հայաստանի տղամարդկանց հավաքականը կմրցի Հունգարիայի հավաքականի հետ:

Այսօր Հայաստանի կանանց հավաքականը 2:2 հաշվով ավարտեց իր հանդիպումը Ամերիկայի հավաքականի հետ:

Հաղթանակ են տարել Լիլիթ Մկրտչյանը և Էլինա Դանիելյանը:

Հայաստանի կանանց հավաքականը կիսում է 5-14-րդ հորիզոնականները Ամերիկայի, Վրաստանի, Գերմանիայի, Հունգարիայի, Ուկրաինայի, Ուզբեկստանի, Մոնղոլիայի, Բուլղարիայի և Նիդերլանդների հավաքականների հետ: Միանձնյա առաջատարը Հնդկաստանի հավաքականն է, իսկ 2-4-րդ հորիզոնականները կիսում են Լեհաստանի, Ղազախստանի և Ֆրանսիայի հավաքականները:

Հաջորդ՝ 8-րդ խաղափուլում Հայաստանի կանանց հավաքականը կմրցի Մոնղոլիայի հավաքականի հետ:

Հաջողություն ենք մաղթում մեր հավաքականներին: