Ավարտվեց Եվրոպայի համալսարանների շախմատի առաջնությունը

Սեպտեմբերի 20-ին Հայաստանի պետական տնտեսագիտական համալսարանում տեղի ունեցավ 2025 թվականի Եվրոպայի համալսարանների արագ և կայծակնային շախմատի առաջնության փակման արարողությունը:

Հայաստանի ֆիզիկական կուլտուրայի և սպորտի պետական ինստիտուտի թիմը դարձավ հաղթող տղաների արագ շախմատի, աղջիկների արագ շախմատի և տղաների կայծակնային շախմատի մրցաշարերում։ Տղաների թիմում հանդես եկան Շանթ Սարգսյանը և Մամիկոն Ղարիբյանը, իսկ աղջիկների թիմում՝ Մարիամ Ավետիսյանը և Մարիամ Խաչատրյանը: Թիմի ավագն է միջազգային կարգի մրցավար, դոցենտ Երվանդ Հակոբյանը: 

Աղջիկների կայծակնային շախմատի մրցաշարում չեմպիոն դարձավ Հայաստանի ամերիկյան համալսարանի թիմը: Թիմի կազմում հանդես եկան Վերոնիկա Խաչատրյանը և Միլենա Գասպարյանը: Թիմի ավագն է Հասմիկ Մարուքյանը:

Մրցանակներն ու մեդալները հանձնեցին ՀՀ ուսանողական մարզական ֆեդերացիայի նախագահ Հովհաննես Գաբրիելյանը, Հայաստանի պետական տնտեսագիտական համալսարանի ռեկտոր և առաջնության կազմակերպչական կոմիտեի նախագահ Արմեն Գրիգորյանը, Եվրոպական համալսարանական մարզական ասոցիացիայի շախմատի տեխնիկական պատվիրակ Ալեքսանդր Սուլիպան և Եվրոպական համալսարանական մարզական ասոցիացիայի գլխավոր քարտուղար Մաթյաժ Պեցովնիկը։

Ներկայացնում ենք բոլոր մրցանակակիրներին.
Տղաների արագ շախմատի մրցաշար
1-ին տեղ՝ Հայաստանի ֆիզիկական կուլտուրայի և սպորտի պետական ինստիտուտ
2-րդ տեղ՝ Բուխարեստի տնտեսագիտական ուսումնարան
3-րդ տեղ՝ Երևանի պետական համալսարան

Աղջիկների արագ շախմատի մրցաշար
1-ին տեղ՝ Հայաստանի ֆիզիկական կուլտուրայի և սպորտի պետական ինստիտուտ
2-րդ տեղ՝ Հունգարիայի սպորտի գիտությունների համալսարան
3-րդ տեղ՝ Հայաստանի ամերիկյան համալսարան

Տղաների կայծակնային շախմատի մրցաշար
1-ին տեղ՝ Հայաստանի ֆիզիկական կուլտուրայի և սպորտի պետական ինստիտուտ
2-րդ տեղ՝ Բուխարեստի տնտեսագիտական ուսումնարան
3-րդ տեղ՝ Օզյեգին համալսարան

Կանանց կայծակնային շախմատի մրցաշար
1-ին տեղ՝ Հայաստանի ամերիկյան համալսարան
2-րդ տեղ՝ Վարշավայի համալսարան
3-րդ տեղ՝ Հունգարիայի սպորտի գիտությունների համալսարան

Շնորհավորում ենք բոլորին և մաղթում նոր հաջողություններ: