Ավարտվեց աշխարհի մինչև 18 տարեկան պատանիների և աղջիկների առաջնությունը

Ամփոփենք հայ շախմատիստների արդյունքները Ալբանիայի Դուրես քաղաքում անցկացված շախմատի աշխարհի 14-18 տարեկան պատանիների և աղջիկների առաջնությունում:

Մինչև 14 տարեկան պատանիների խմբում Մանվել Առաքելյանը 11 հնարավորից վաստակեց 8 միավոր և կիսեց 3-7-րդ հորիզոնականները՝ լրացուցիչ ցուցանիշներով զբաղեցնելով 4-րդ տեղը: Նույն տարիքային խմբում Տիգրան Համբարձումյանը վաստակեց 7 միավոր, իսկ Տիգրան Սողոմոնյանը՝ 5 միավոր:

Մինչև 18 տարեկան պատանիների խմբում Ռուդոլֆ Փաշիկյանը վաստակեց 7.5 միավոր և կիսեց 5-12-րդ հորիզոնականները՝ լրացուցիչ ցուցանիշներով զբաղեցնելով 11-րդ հորիզոնականը: Նույն տարիքային խմբում Վահե Սուքիասյանը վաստակեց 7 միավոր և զբաղեցրեց 13-րդ հորիզոնականը, իսկ Ռոբերտ Փիլիպոսյանը վաստակեց 6.5 միավոր:

Մինչև 18 տարեկան աղջիկների խմբում Նվարդ Հայրապետյանը վաստակեց 7 միավոր և կիսեց 9-14-րդ հորիզոնականները՝ լրացուցիչ ցուցանիշներով զբաղեցնելով 13-րդ տեղը: Նվարդը նաև լրացրեց կանանց միջազգային վարպետի իր առաջին նորման:

Մինչև 16 տարեկան աղջիկների խմբում Անահիտ Մկրտչյանը և Անի Ավետիսյանը վաստակեցին 7 միավոր և համապատասխանաբար զբաղեցրին 17-րդ և 18-րդ տեղերը:

Մինչև 16 տարեկան պատանիների խմբում Վաչե Հովակիմյանը վաստակեց 6.5 միավոր:

Մինչև 14 տարեկան աղջիկների խմբում Գաբրիելա Հարությունյանը վաստակեց 6 միավոր:

Առաջնությունում իրենց վարկանիշները զգալիորեն բարելավել են Անահիտ Մկրտչյանը (+196,8 կետ) և Նվարդ Հայրապետյանը (+134 կետ):