Ուսումնամարզական հավաք Արզնիում

Հայաստանի շախմատի ֆեդերացիայի խորհրդի անդամ Աղասի Ինանցի նախաձեռնությամբ և հովանավորությամբ մայիսի 16-ից 22-ը Արզնիում կայացավ ուսումնամարզական հավաք, որին մասնակցեցին Հայաստանի 8-ից 18 տարեկան պատանիների և աղջիկների առաջնությունների առաջին և երկրորդ տեղերը զբաղեցրած շախմատիստները։

Բավականին ներկայացուցչական կազմ ուներ մարզչական շտաբը՝ Հայաստանի տղամարդկանց հավաքականի անդամ, եռակի օլիմպիական չեմպիոն, գրոսմայստեր Գաբրիել Սարգսյանի գլխավորությամբ։

Ամենօրյա ինտենսիվ մարզումներն անցկացնող մարզչական թիմում էին նաև գրոսմայստերներ Արամ Հակոբյանը, Հովիկ Հայրապետյանը, ՖԻԴԵ-ի ավագ մարզիչ Մանվել Ավետիսյանը, ինչպես նաև ՖԻԴԵ-ի մարզիչներ Վահագն Խաչատրյանը և Սարգիս Մանուկյանը։

Հավաքին հրավիրված էին նաև այնպիսի հեղինակավոր շախմատիստներ, ինչպիսիք են Հայաստանի տղամարդկանց ազգային հավաքականի գլխավոր մարզիչ, ՖԻԴԵ-ի ավագ մարզիչ, գրոսմայստեր Արման Փաշիկյանը, Հայաստանի մանկապատանեկան հավաքականի գլխավոր մարզիչ, գրոսմայստեր Արտաշես Մինասյանը, Հայաստանի տղամարդկանց ազգային հավաքականի առաջատար գրոսմայստեր Շանթ Սարգսյանը, կանանց հավաքականի բազմամյա առաջատար, գրոսմայստեր Էլինա Դանիելյանը, Հայաստանի պատանեկան առաջնությունների բազմակի չեմպիոն, հեղինակավոր մարզիչ, ՖԻԴԵ-ի մարզիչ գրոսմայստեր Տիգրան Հարությունյանը։ 

Հավաքի շրջանակներում անցկացվեց նաև կայծակնային շախմատի մրցաշար, որտեղ պարգևատրվեցին առաջին հինգ հորիզոնականները զբաղեցրած շախմատիստները, իսկ հաղթող ճանաչվեց ՖԻԴԵ-ի վարպետ Տիգրան Համբարձումյանը։

Նման հավաքները շատ ոգևորիչ են պատանի շախմատիստների համար և անկասկած դրական ազդեցություն կունենան նրանց առաջիկա միջազգային մրցաշարերում։

Ֆոտոշարք