Մեկնարկեց Ստեփան Ավագյանի մանկապատանեկան հուշամրցաշարը

Մայիսի 27-ին մեկնարկեց Հայաստանի շախմատի ակադեմիայի կողմից կազմակերպված Ստեփան Ավագյանի մանկապատանեկան հուշամրցաշարը, որն այս տարի համախմբել է ավելի քան 460 պատանի շախմատիստների։

Մրցաշարի բացման արարողության ընթացքում մասնակիցներին ողջունեցին Հայաստանի շախմատի ակադեմիայի հիմնադիր-տնօրեն Սմբատ Լպուտյանը և մրցաշարի գլխավոր մրցավար Գևորգ Մուրադյանը՝ ներկայացնելով մրցաշարի կանոնակարգը, կարևորելով նման մրցաշարերի դերը երիտասարդ շախմատիստների զարգացման գործում և բոլորին մաղթելով հաջող մրցելույթներ ու հետաքրքիր պայքար։

Բացման արարողության ընթացքում մասնակիցներն ու հյուրերը դիտեցին նաև Ստեփան Ավագյան հիշատակին նվիրված ֆիլմ, որն ևս մեկ անգամ ընդգծեց նրա ներդրումը հայկական շախմատի զարգացման գործում։

Սրտանց ողջունում ենք բոլոր մասնակիցներին և մաղթում հաջողություն, գեղեցիկ պարտիաներ, վստահ քայլեր ու անմոռանալի մրցաշարային օրեր։