ՖԻԴԵ-ի դպրոցականների աշխարհի թիմային առաջնության Եվրոպայի փուլ

Սեպտեմբերի 28-ից հոկտեմբերի 3-ը Հայաստանը կհյուրընկալի FIDE ISCF World Schools Team Championship 2026-ի Եվրոպական մայրցամաքային փուլը՝ մեկ հարկի տակ համախմբելով Եվրոպայի տարբեր երկրներից ժամանած դպրոցական ուժեղագույն թիմերին։

Մրցաշարի օրերը չեն լինելու լցված միայն շախմատով։ Մրցաշարը նաև Հայաստանը բացահայտելու հնարավորություն է․ մասնակիցներին սպասում են մշակութային այցելություններ, կրթական ծրագրեր, վարպետության դասեր և այլ միջոցառումներ, որոնք թույլ կտան ոչ միայն մրցել միմյանց դեմ, այլև ծանոթանալ Հայաստանի պատմությանը, մշակույթին ու ավանդույթներին և բացահայտել Ծաղկաձորը։

Այս մեծ միջազգային հանդիպմանը Հայաստանը կներկայացնեն երեք դպրոցական թիմ, որոնք այդ իրավունքը ձեռք են բերել ՀՀ դպրոցականների շախմատի օլիմպիադայի արդյունքներով՝
Երևանի հ. 77 հիմնական դպրոց
«Մխիթար Սեբաստացի» կրթահամալիր
Այնթափի հ. 1 միջնակարգ դպրոց 

Երեք թիմերի համար սա միջազգային մրցակցության նոր փորձ է, իսկ Հայաստանի համար՝ հնարավորություն հյուրընկալելու շախմատային աշխարհը մեկ հարկի տակ։