Շախմատը դարձավ Բյուրականի տոնական օրվա մի մասը

Այսօր Բյուրականի աստղագիտական կենտրոնը նշեց իր հիմնադրման 10-ամյակը՝ կազմակերպելով տոնական միջոցառում, որը համախմբեց գիտությունը, արվեստը և սպորտը։

Միջոցառմանը մասնակցեցին նաև Հայաստանի շախմատի ակադեմիայի հիմնադիր-տնօրեն, գրոսմայստեր Սմբատ Լպուտյանը և ակադեմիայի մի շարք սաներ։

Սմբատ Լպուտյանը անցկացրեց համաժամանակյա խաղ՝ մրցելով միջոցառման մասնակիցների հետ։

Իսկ ակադեմիայի սաները՝ գրոսմայստեր Մանուել Պետրոսյանի և միջազգային վարպետ Արսեն Դավթյանի գլխավորությամբ, մասնակցեցին յուրօրինակ շոու-խաղի, որտեղ հենց նրանք էին մարմնավորում շախմատի կենդանի ֆիգուրներ։

Տոնական օրը միավորեց գիտության, արվեստի և մտքի խաղի սիրահարներին՝ ևս մեկ անգամ ընդգծելով, որ շախմատը ոչ միայն մարզական, այլև կրթական և մշակութային արժեք ունի՝ ստեղծարար մտածողությամբ միավորելով տարբեր ոլորտների մարդկանց։