«Շախմատի կրթության տեսություն և պրակտիկա» միջազգային գիտաժողով

Հոկտեմբերի 1-ից 2-ը Ծաղկաձորում անցկացվում է «Շախմատի կրթության տեսություն և պրակտիկա» միջազգային գիտաժողովը, որը մեկ հարկի տակ է համախմբել կրթության ոլորտի հետազոտողների, համալսարանների դասախոսների, շախմատի ուսուցիչների ու մարզիչների, կրթական ծրագրերի մասնագետների և կրթական կազմակերպությունների ներկայացուցիչների՝ քննարկելու շախմատի կրթական հնարավորություններն ու ժամանակակից ուսուցման մոտեցումները։

Գիտաժողովի բացման խոսքով հանդես են եկել Խաչատուր Աբովյանի անվան հայկական պետական մանկավարժական համալսարանի ռեկտորի պաշտոնակատար Լիլիթ Մկրտչյանը, Հայաստանի շախմատի ֆեդերացիայի նախագահի առաջին տեղակալ, «Շախմատ» գիտահետազոտական ինստիտուտի տնօրեն, Հայաստանի շախմատի ակադեմիայի հիմնադիր-տնօրեն Սմբատ Լպուտյանը և Շախմատի միջազգային դպրոցական ֆեդերացիայի գլխավոր տեխնիկական տնօրեն Անդրեյ Վոդիանովը։

Գիտաժողովի երկրորդ օրը՝ հոկտեմբերի 2-ին, հանդես է եկել նաև Եվրոպական շախմատի միության նախագահ Զուրաբ Ազմայփարաշվիլին։

Միջոցառման շրջանակում ստորագրվել է համագործակցության հուշագիր Խաչատուր Աբովյանի անվան հայկական պետական մանկավարժական համալսարանի և Շախմատի միջազգային դպրոցական ֆեդերացիայի միջև՝ կրթական և գիտական համագործակցության ամրապնդման նպատակով։